تجربتى مع خبيرة التجميل عايزة تعرفى ازاى تبقى اجمل عروسة

انا زى كتير من البنات حجزت مع خبيرة مكياج غالية شوية علشان اكون عروسة أمورة وميكونش الميكب بتاعى اوفر............. فابقى زى عروسة المولد ولا اكون بهتانة زى التعبانة ...............كان نفسى اكون عروسة رقيقة كده والحمد لله كل اللى شافنى يوم الفرح قاللى كنتى زى الملاك وانا قولت اقول لكم بقى تجربتى مع خبيرة الميكب ومش عايزة منكم غير دعوة حلوة  .
انا هتكلم على البرنامج قبل الفرح بشهر ولو بأتم من قبل كده يا ريت
اول حاجة طبعا بشرتك 
لازم تهتمى بيها كويس جدا لأن دى اللى بتبين جمالك او تغطى عليه ودى اسهل خطوات للاهتمام المتكامل للبشرة
- اول لما تصحى من النوم تشربى على الريق كوب لبن عليه معلقة عسل ومعلقة خميرة تحطيهم على بعض وتقلبى كويس وممكن تسبيهم 5 دقائق كده بشرط اللبن يكون دافىء علشان الخميرة متمتش .
و لو مقدرتيش هاتى كبسولات الخميرة من الصيدليه.

ودى بقى وصفة تحفة مع ان طعمهانص نص بس فعلا بتنقى البشرة وتزيل حب الشباب واى شوائب ليه بقى علشان دى بتطهر المعدة والجسم من السموم والميكروبات اللى بتأثر على بشرتنا ....
- تانى حاجة تبلى قطنة بماء الورد وتمسحى وشك ورقبتك .
لمدة شهر قبل الفرح ده الروتين اليومى .

- تعملى بقى ماسك لبشرتك مرتين فى الاسبوع وممن يكونوا ماسكين مختلفين او زى بعض.
وانا هقولكم خبيرة التجميل قالت لى على ماسكات ايه :-

الاول :ماسك القهوه وبياض البيض


 ده كان غريب اوى بياض بيضة مع معلقة بن ناعم..... اه والله بتخلطيهم كويس وتحطيهم على وشك وتسبيه لحد ما يجف وبعدين تغسليه بماء فاتر(من الصنبور)
الماسك ده لتوحيد لون البشرة وبيفتح وينفع  لاى بشره ممكن تضعه.

القهوة مضاد للاكسدة جميلة مفيد جدا للبشرة .

- تانى واحد تجيبى ترمس مطحون وتحطى عليه ماء ورد وبس يبيض وينور ...وهذا بيتعمل بين الماسكين فى الاسبوع .

- تانى حاجة شعرك
بقى تهتمى بيه حمامات كريم بقى او زيت على حسب طبيعة شعرك اختارى اللى يناسبك وعدد المرات على حسب حاجة شعرك

- نيجى بقى لجسمك
الاحسن انك تعملى حمام مغربى قبل الفرح بيومين وقبل ازالة الشعر علشان بيطلع الشعر اللى تحت الجلد ده لو عندك شعر صغير تحت الجلد او شعر قصير كتير
 لكن لو مش عندك ده اعملي الحمام المغربى بعد ازلة الشعر.
ولو عايزه تعمليه بنفسك سهل جدا هاتى الليفة المغربية من اى صيدليه واى وصفة بقى من النت واسهلهم  تدهنى جسمك بالترمس المطحون المخلوط بمية الورد وبعدين لما ينشف شوية تدعكيه بالليفة المغربى لحد لما يتشال وبعدين تستحمى عادى.
 ولو حسيتى انك ممكن تحتاجى اكتر من حمام اعملى مرتين فى الاسبوع قبل الفرح .
-بالنسبه للتخسيس بشرب كوباية ماء عليه معلقة خل تفاح قبل كل وجبة حلو اوى للتخسيس 
وكنت بحاول اقلل اكلى شوية مع المشي الكتير.


- النوم الجيد ووجهك
وطبعا لازم تنامى عدد ساعات مش اقلل من سبع ساعات متصلة علشان عينك متكونش مجهدة.
-ده غير ان لو عندك هالات سوداء اصلا حطى كمادات من شرائح البطاطس  يوم ويوم اخر  شرائح الخيار 
-ولو رموشك قصيرة ولا خفيفة ادهنيها كل يوم قبل النوم بزيت خروع.
-ميكب الفرح
واخر حاجة اختارى واحدة تعمل ميكب خفيف ولايق لك ويكون لايق مع لون الورد اللى هتمسكيه فى ايدك وربنا يتمم بخير
انا كده خلصت .
ملحوظة مهمة :يا ريت متقلعيش حجابك يوم فرحك علشان تبتدى برضا ربنا وحتى بلاش ارجوكم تبينوا جزء من شعركم من الحجاب واختارى لفة رقيقة مش مبالغ فيها علشان تبقى زى الملاك ان شاء الله
منقول

تعليقات