إعملى حمامك المغربى بكل سهولة ومن غير بعزقة لفلوسك فى صالونات التجميل

إعملى حمامك المغربى بكل سهولة ومن غير بعزقة لفلوسك فى صالونات التجميل إعملى حمامك المغربى بكل سهولة ومن غير بعزقة لفلوسك فى صالونات التجميل إعملى حمامك المغربى بكل سهولة ومن غير بعزقة لفلوسك فى صالونات التجميل
السلام عليكم يا حبيباتى المحتاسين
ومن مشاكل بشرتكم متعكننيييييييين
ومن حب الشباب والغمقان متبهدلييييييييين
والحل عارفينه بس مطنشيييييين
يا خراشى عليه شااااااعرة والله يا بت يا باربى ههههههههه
الحل يا حبايبى كلنا عارفينه وهو الحمام المغربى بس أغلبيتنا مكسلين يعملوه خصوصا المتزوجات مننا وطبعا إحنا نلتمس ليهم العذر بس برضه ممكن يعملوا الحمام المغربى ده مرة كل شهر وفى البيت من غير ما تروحى لصالونات التجميل وتدفعى فلوس كتيييير ..والله عن تجربة أنا مستمرة عليه بقالى شهرين بعمله كل أسبوع وما شاء الله بشرتى دلوقتى جميلة  وناعمة زى الحرير وكله إشطة أوى والنتيجة بانت من أول مرة أنا أصلا بشرتى بيضا بس كان الإجهاد والإرهاق كان مخليها تعبانة كده و فيها حبوب وكانت خلاض هتبتدى تسود فقلت لاااااااا لازم أهتم شوية خصوصا إنى جوازى بعد شهور وخطيبى مسافر ولازم ييجى يلاقينى مزة المزز وإلا هيطفش منى ويسافر تانى قمت عاملة الحمام المغربى والنتيجة وااااااو جربوا بس ما تكسلوش ..
الأدوات المطلوبة كالآتى :-
صابون مغربى

ليفة مغربية

إسفنجة ناعمة

حجر خفاف

زيت اللوز

ماء ورد


الطريقة بأه يا حبايبى كالآتى :-

إفتحى المية السخنة فى البانيو لحد ما البخار يملاء الحمام


-ومش لازم على فكرة تقفلى منافذ الهوا والكلام ده عشان الناس إللى بتتخنق من البخار.


تعرفوا أنا عملت إيه ههههههههههههههه مش هتصدقوا أصل أنا برضه بتخنق من البخار يعنى مش لدرجة إنى أقفل منافذ الهواء ماهو مش عشان أعالج بشرتى أموت يعنى  شوفوا بأه أنا خليت المية السخنة تملا نص البانيو وبعدين جبت كرسى وحطيته فى نص البانيو وقعدت عليه


وبكده بأه كل البخار بيطلع على جسمى ..إوعى تقعى يا فتوكة فى المية السخنة أحسن تتسلقى وتبقى ساعتها أم رجل مسلوخة ..

- بعد كده يا ستى تغمسى الليفة المغربية فى المية السخنة دى وبعدين وتدعكى بيها جسمك على الطاير كده وبعد ما جسمك ياخد كمية كافية من البخار
 -تحطى الصابون المغربى على جسمك كله ووشك ما عدا منطقة العين وتسيبه لمدة 10 دقايق.



- بعد كده تدعكى جسمك بأة بالليفة المغربية بذمة بس مش بذمة أوى لأصحاب البشرة الحساسة

وشوفى البلاوى بأة إللى بتطلع من جسمك والخلايا الميتة هتقع بسهولة جدا ..

- أما بالنسبة لوجهك بـأة هتمسحيه بالإسفنجة الناعمة من غير دعك أو ضغط

لأنى قرأت على النت إن الضغط على البشرة بيخلى التجاعيد تظهر مبكراً.

-وبعدين تشطفى جسمك ووشك بالمية السخنة


- وبعدين هتحطى على جسمك تانى صابون مغربى و تسيبيه 10 دقايق

- وبعدين تدعكيه تانى
-وتحطى فى المية إللى هتشطفى بيها جسمك المرادى مية ورد
-و فى خلال ال 10 دقايق إللى بتسيبى فيهم الصابون على جسمك تحطى رجلك فى ميه سخنة فيها شوية ملح وشاور جل وتدعكيها وهى فى المية بالحجر الخفاف

....وأخيراً  تدهنى جسمك كله ووشك بزيت اللوز وده فايدته إنه بيفتح البشرة ويخليها تلمع ومبروووووك عليكى  الجلد الجديد.

مش عايزة منكم غير إنكم تدعولى إن ربنا ما يحرمنيش من أمى و تدعو لخطيبى إن ربنا يرزقه بالرزق الحلال ويرجعهولى بالسلامة ويعجل زواجنا وييسر أمورنا

منقول للافادة